అక్రమ రహదారి తొలగింపు

యంత్రంతో  రహదారిని తొలగిస్తున్న అధికారులు

గిద్దలూరు పట్టణం, న్యూస్‌టుడే : గిద్దలూరులోని జగనన్న కాలనీలో స్థలాన్ని ఆక్రమించి ఓ స్థిరాస్తి వ్యాపారి వేసిన రహదారిని మంగళవారం నగర పంచాయతీ, రెవెన్యూ అధికారులు తొలగించారు. ‘జగనన్న కాలనీని వదల్లేదు’ శీర్షికన ‘ఈనాడు’లో కథనం ప్రచురితమవడంతో అధికారులు స్పందించారు. ఒంగోలు-నంద్యాల రహదారిలో ఏర్పాటుచేసిన కాలనీలో స్థిరాస్తి వ్యాపారి సుమారు 30 సెంట్ల మేర నగర పంచాయతీ స్థలం ఆక్రమించి రోడ్డు వేసినట్లు గుర్తించారు. దాని విలువ బహిరంగ మార్కెట్‌లో రూ.80 లక్షలు ఉంటుంది. కమిషనర్‌ వై.రామకృష్ణయ్య, తహసీల్దారు రాజా రమేష్‌, పట్టణ ప్రణాళికా విభాగం అధికారి సతీష్‌, సర్వేయర్‌ తదితరులు ఆ రహదారిని తొలగించాలని సిబ్బందికి సూచించారు. అక్రమ లేఅవుట్‌లోకి జగనన్న కాలనీలోంచి రోడ్డు లేదని స్పష్టంచేశారు. కాలనీ ఆక్రమణకు గురికాకుండా చుట్టూ ప్రహరీ నిర్మాణం చేపట్టేందుకు ప్రతిపాదనలు పంపుతున్నట్లు కమిషనర్‌ తెలిపారు.