కార్మికుల పనివేళలు రీ షెడ్యూల్‌ చేయాలి

ఒంగోలు గ్రామీణం, న్యూస్‌టుడే: జిల్లాలో ఉష్ణోగ్రతలు, వడగాలులు అధికంగా ఉన్నందున వివిధ రంగాల్లో పనిచేస్తున్న ఉద్యోగులు, కార్మికుల పనివేళలను రీ షెడ్యూల్‌ చేయాలని కార్మికశాఖ ఉప కమిషనర్‌ ఎస్‌.శ్రీనివాస్‌ కుమార్‌ తెలిపారు. రోజు వారీ భవన నిర్మాణ కార్మికులు, సంఘటిత, అసంఘటిత రంగాల్లో పనిచేస్తున్న ఒప్పంద కార్మికుల రక్షణకు ఇటుకల బట్టీలు, దుకాణాలు, సంస్థలు, పరిశ్రమల యజమానులకు పలు మార్గదర్శకాలు, సూచనలు జారీ చేశామన్నారు. పని ప్రదేశాల్లో అవసరాల మేరకు తాగునీటి సౌకర్యం కల్పించడంతో పాటు, భవన నిర్మాణ కార్మికులకు అత్యవసర ఐస్‌ ప్యాక్స్‌ అందించాలని సూచించారు. ఆరోగ్యశాఖ సమన్వయంతో కార్మికులకు క్రమం తప్పకుండా ఆరోగ్య పరీక్షలు నిర్వహించాలన్నారు. కార్మికశాఖ ఆదేశాలను ప్రతి ఒక్క యజమాని పాటించాలని సూచించారు. కార్మికులకు ఉపశమనం కల్పించే కార్యక్రమాలను విస్తృతం చేయాలని ఆయన ఓ ప్రకటనలో పేర్కొన్నారు.