జై చెన్నకేశవా.. జైజై చెన్నకేశవా

శ్రీదేవి, భూదేవి సమేత లక్ష్మీచెన్నకేశవస్వామి

నాలుగు యుగాల దేవుడిగా భక్తుల నుంచి పూజలందుకునే మార్కాపురం పట్టణంలోని శ్రీలక్ష్మీచెన్నకేశవస్వామి రథోత్సవం బుధవారం రాత్రి అత్యంత వైభవంగా సాగింది. తొలుత శ్రీదేవి, భూదేవి సమేత స్వామివారిని ప్రత్యేకంగా అలంకరించి పూజలు చేశారు. వేద మంత్రాల మధ్య తోడ్కొని వచ్చి రథంపై కొలువుదీర్చారు. అనంతరం అశేష భక్త జనవాహిని మధ్య స్వామివారి రథోత్సవం మాఢ వీధుల్లో కనుల పండువగా నిర్వహించారు. ఈ సందర్భంగా జై చెన్నకేశవ.. జైజై చెన్నకేశవా అంటూ భక్తులు చేసిన జయ జయ ధ్వానాలతో మాఢ వీధులు మార్మోగాయి. ఉత్సవాన్ని తిలకించేందుకు పట్టణంతో పాటు జిల్లా నలుమూలల నుంచి పెద్దసంఖ్యలో తరలివచ్చారు. వేల మంది మధ్య ఉత్సవం దాదాపు రెండు గంటల పాటు సాగింది.

అశేష భక్త జనం మధ్య మాఢ వీధుల్లో సాగుతున్న రథోత్సవం... 

న్యూస్‌టుడే, మార్కాపురం పట్టణం