విజిలెన్స్‌ దాడుల్లో బియ్యం పట్టివేత

వివరాలు నమోదు చేసుకుంటున్న విజిలెన్స్‌, రెవెన్యూ అధికారులు

కొత్తూరు, న్యూస్‌టుడే: మెట్టూరు బిట్‌-1 నిర్వాసిత కాలనీలో పెద్ద ఎత్తున బియ్యం నిల్వలు ఉన్న గోదాంపై విజిలెన్స్‌ అధికారులు దాడులు చేశారు. 50 కిలోల బియ్యం బస్తాలు 40 ఉన్న వ్యాన్‌ కొత్తూరు మండలం నుంచి తరలుతున్నట్లు శనివారం సమాచారం అందుకొని దాన్ని విజిలెన్స్‌ అధికారులు పట్టుకొని డ్రైవర్‌ను ప్రశ్నించగా వివరాలు వెల్లడయ్యాయి. దీంతో విజిలెన్స్‌ ఎస్సై రామారావు, టాస్క్‌ఫోర్స్‌ ఎస్సై అశోక్‌కుమార్‌ ఆధ్వర్యంలో బృందం ఈ నిర్వాసిత కాలనీలో ఉన్న పి.ఉమామహేశ్వరరావుకు చెందిన గోదాం వద్దకు చేరుకొని నిల్వ ఉన్న బియ్యం బస్తాలను పరిశీలించారు. పెద్ద సంఖ్యలో 50 కిలోల బియ్యం బస్తాలు నిల్వ ఉండటాన్ని గుర్తించారు. రెవెన్యూ అధికారులకు ఈ మేరకు సమాచారం అందించారు. తహసీల్దార్‌ సురేష్‌ వద్దకు చేరుకొని పరిస్థితిని సమీక్షించారు. 50 నుంచి 60 టన్నుల వరకు బియ్యం ఉన్నట్లు ప్రాథమికంగా అంచనా వేసినట్లు ఆయన పేర్కొన్నారు. ఆదివారం నాటికి పూర్తిస్థాయి లెక్కింపు చేపట్టి, కేసు నమోదు చేస్తామన్నారు.