భర్త పార్లమెంటుకు.. భార్య అసెంబ్లీకి పోటీ

ఎన్నికల బరిలో చేపల వ్యాపారి దంపతులు

దుర్గారావు, కామేశ్వరి

చేపల వ్యాపారం చేసుకుంటూ జీవనం సాగిస్తున్న దంపతులు ఎన్నికల బరిలో నిలిచి అందరి దృష్టిని ఆకర్షిస్తున్నారు. పోలాకి మండలం యాట్ల బసివలస గ్రామానికి చెందిన కాయ దుర్గారావు, ఆయన భార్య కామేశ్వరి నరసన్నపేటలోని పెద్దపేట సమీపంలో చేపలు విక్రయిస్తుంటారు. దాదాపు 10 కి.మీ. దూరం నుంచి నరసన్నపేటకు వచ్చి చేపలు అమ్ముకునే వీరికి ఎన్నికల్లో పోటీ చేయాలన్న ఆలోచన వచ్చింది. ప్రస్తుతం వేట నిలిచిపోవడంతో వారి వ్యాపారానికి కూడా విరామం వచ్చింది. దీంతో నవరంగ్‌ కాంగ్రెస్‌ పార్టీ తరఫున శ్రీకాకుళం పార్లమెంట్‌ స్థానం నుంచి భర్త, నరసన్నపేట అసెంబ్లీ నుంచి భార్య పోటీకి దిగారు. పేదరికంలో ఉన్న తాము డీపట్టా భూముల సమస్యపై 2020 నుంచి తిరుగుతున్నా ప్రయోజనం లేకపోయిందని, అందుకే ఎన్నికల్లో పోటీ చేస్తున్నామని దుర్గారావు వివరించారు.

న్యూస్‌టుడే, నరసన్నపేట