గజవాహనంపై చంద్రశేఖరుడి వైభవం

వెండి గజవాహనంపై ఊరేగుతున్న స్వామివారు

తిరువణ్ణామలై, న్యూస్‌టుడే: అరుణాచలేశ్వరస్వామి ఆలయంలో కార్తిక మహాదీపోత్సవాలు గత నెల 27వ తేదీన ప్రారంభమై వైభవంగా కొనసాగుతున్నాయి. ఇందులోభాగంగా శుక్రవారం ఉదయం గణపతిని మూషిక వాహనంపై ఊరేగించారు. తర్వాత ఉన్నాములై సమేత చంద్రశేఖరస్వామిని వెండి గజవాహనంపై కొలువుదీర్చారు. ఆలయ మాడ వీధుల్లో భక్తులకు ఆయన దర్శనభాగ్యం కల్పించారు. ఆ సమయంలో అరుణాచలేశ్వరస్వామిపై భక్తి చాటిన తిరుజ్ఞానసంబందర్‌, తిరునావుకరసర్‌, సుందరర్‌, మాణిక్యవాసగర్‌లనూ ఊరేగించారు. తర్వాత 63 నాయన్మారుల ఊరేగింపు కనులపండువగా సాగింది. సంతానం పొందిన దంపతులు చెరకు గడలకు ఊయల కట్టి పిల్లలను అందులో ఉంచి మాడ వీధుల్లో తిరుగుతూ మొక్కులు తీర్చుకున్నారు. ఈ ఉత్సవంలో భక్తులు పెద్ద సంఖ్యలో పాల్గొన్నారు.

63 నాయన్మారుల ఊరేగింపు దృశ్యం

చెరకు గడ ఊయలలో సంతానాన్ని ఉంచి మొక్కు చెల్లిస్తున్న దృశ్యం