పోలీసుల అదుపులో ఎర్రచందనం కూలీ

మరో అయిదుగురు పరారీ

కలికిరిగ్రామీణ, న్యూస్‌టుడే: తమిళనాడు రాష్ట్రం నుంచి అన్నమయ్య జిల్లాలోకి ప్రవేశించిన ఆరుగురు ఎర్రచందనం కూలీల్లో ఒకరు కలికిరి పోలీసులకు పట్టుబడగా మరో అయిదుగురు తప్పించుకుని పారిపోయారు. సోమవారం రాత్రి తమిళనాడు రాష్ట్రం నుంచి ఓ కారులో చిత్తూరు జిల్లా పలమనేరులోకి ప్రవేశించిన కూలీలు చౌడేపల్లె, సోమల మీదుగా జిల్లాలోని కలికిరికి వస్తున్నట్లు పోలీసులకు ముందస్తు సమాచారం అందింది. అప్రమత్తమైన పోలీసులు పట్టుకునేందుకు ప్రయత్నం చేయగా రూటు మార్చిన వారు వాల్మీకిపురం మండలంలోని మేకలవారిపల్లె మీదుగా దారి మళ్లించారు. ఈ క్రమంలో మేకలవారిపల్లె సమీపంలో 5 మంది కూలీలు తప్పించుకోగా కూలీని పోలీసులు అదుపులోకి తీసుకుని కారును స్వాధీనం చేసుకున్నారు. పారిపోయిన వారి కోసం పోలీసులు విస్తృతంగా గాలిస్తున్నట్లు సమాచారం.