తెదేపాలో చేరిన వైకాపా కార్యకర్తలు

కార్పొరేషన్‌, వన్‌టౌన్‌, న్యూస్‌టుడే: ఎన్నికల తర్వాత ముఖ్యమంత్రిగా చంద్రబాబు సచివాలయానికి, మాజీ ముఖ్యమంత్రిగా జగన్‌ ఇంటికి వెళ్లడం ఖాయమని తెదేపా విశాఖ పార్లమెంట్‌ నియోజకవర్గ అధ్యక్షుడు, దక్షిణ నియోజకవర్గ ఇన్ఛార్జ్‌ గండి బాబ్జీ అన్నారు. ఇటీవల వైకాపా నుంచి తెదేపాలోకి వచ్చిన సీతంరాజు సుధాకర్‌ ఆధ్వర్యంలో వందలాది మంది వైకాపా కార్యకర్తలు శుక్రవారం తెదేపాలో చేరారు. పార్టీ కార్యాలయంలో గండి బాబ్జీ వారికి కండువాలు వేసి ఆహ్వానించారు. ఆయన మాట్లాడుతూ రాష్ట్ర వ్యాప్తంగా వైకాపా వ్యతిరేక పవనాలు వీస్తున్నాయని, ప్రజలు మార్పు కోరుకుంటున్నారన్నారు. పార్టీలో చేరినవారంతా తెదేపా, జనసేన, భాజపా కూటమిని అధికారంలోకి తీసుకొచ్చేలా కృషి చేయాలన్నారు. కార్యక్రమంలో పార్టీ విశాఖ ఎంపీ అభ్యర్థి ఎం.శ్రీభరత్‌ తదితరులు పాల్గొన్నారు.