నకిలీ నోట్ల చెలామణి

 దంపతుల అరెస్టు

వివరాలు వెల్లడిస్తున్న ఎస్సై ప్రయోగమూర్తి

పార్వతీపురం పురపాలక, న్యూస్‌టుడే: నకిలీ నోట్లను చెలామణి చేస్తున్న దంపతులను పార్వతీపురం పట్టణ పోలీసులు అరెస్టు చేశారు. ఎస్సై ప్రయోగమూర్తి సోమవారం కేసు వివరాలు వెల్లడించారు. పట్టణానికి చెందిన సత్యనాగమల్లేశ్వరరెడ్డి, వనజ దంపతులకు ఈనెల 11న రాజమహేంద్రవరానికి చెందిన అనిల్‌రెడ్డి అనే వ్యక్తితో అనపర్తిలో జరిగిన ఓ వివాహ వేడుకలో పరిచయం ఏర్పడింది. ఈక్రమంలో ఆయన నకిలీ నోట్ల గురించి వీరికి వివరించి, రూ.10 వేలు తీసుకుని రూ.20 వేల నకిలీ నోట్లు ఇచ్చాడు. అక్కడ నుంచి వచ్చిన తర్వాత వీరు బొబ్బిలిలోని దాడితల్లి పండగకు వెళ్లి కొన్ని నోట్లు మార్చారు. అనంతరం ద్విచక్రవాహనంపై జిల్లాలోని పలు ప్రాంతాలతోపాటు రాయగడలో తిరిగి వివిధ రకాల వస్తువుల కొనుగోళ్లకు చెల్లని నోట్లిచ్చారు. మూడురోజుల క్రితం కొమరాడ మండలం కోటిపాంలోని ఓ దుకాణం వద్ద ఇలాగే కొనుగోలు చేస్తూ దుకాణదారుడికి దొరికిపోయారు. అతని ఫిర్యాదు మేరకు కేసు నమోదు చేసిన పోలీసులు ఆదివారం పార్వతీపురంలోని పాతబస్టాండు వద్ద ఇద్దరినీ అదుపులోకి తీసుకున్నారు. వారి నుంచి కొన్ని దొంగనోట్లు, ద్విచక్ర వాహనం, సామగ్రి స్వాధీనం చేసుకున్నట్లు ఎస్సై తెలిపారు. అనిల్‌రెడ్డిపై కేసు నమోదు చేసి, అరెస్టు చేసేందుకు బృందాలను పంపిస్తున్నట్లు చెప్పారు.