అంబేడ్కర్‌ స్ఫూర్తితో రాష్ట్రంలో కేసీఆర్‌ పాలన

అంబేడ్కర్‌ విగ్రహానికి పూలమాల వేసి నివాళులు అర్పిస్తున్న మంత్రి సత్యవతిరాథోడ్‌

మహబూబాబాద్‌, న్యూస్‌టుడే: అణగారిన వర్గాల సంక్షేమం, అభివృద్ధిలో సామాజిక న్యాయం అందించాలనే లక్ష్యంతో పోరాడిన అంబేడ్కర్‌ ఆశయాలను స్ఫూర్తిగా తీసుకుని ముఖ్యమంత్రి కేసీఆర్‌ రాష్ట్రంలో పాలన సాగిస్తున్నారని మంత్రి సత్యవతిరాథోడ్‌ అన్నారు. అంబేడ్కర్‌ వర్ధంతి సందర్భంగా మంగళవారం జిల్లా కేంద్రంలో అంబేడ్కర్‌ విగ్రహానికి పూలమాల వేసి నివాళులర్పించారు. అనంతరం మంత్రి మాట్లాడుతూ ఆయన రచించిన రాజ్యాంగ ఫలాలను అన్ని వర్గాల ప్రజలకు చేరవేయాలనే సంకల్పంతో ముఖ్యమంత్రి కేసీఆర్‌ దళిత, బహుజనులకు ప్రత్యేక పథకాలను అమలు చేస్తున్నారన్నారు. రాష్ట్రంలో 125 అడుగుల ఎత్తైన విగ్రహాన్ని ఏర్పాటు చేస్తున్నామన్నారు. నూతన సచివాలయానికి ‘డాక్టర్‌ బీఆర్‌.అంబేడ్కర్‌ తెలంగాణ రాష్ట్ర సచివాలయం’ అని నామకరణం చేసి ముఖ్యమంత్రి దళితులపై ఆయనకు ఉన్న చిత్తశుద్ధి ఏమిటో గుర్తించాలన్నారు. జిల్లా కేంద్రంలో గిరిజన సంక్షేమ శాఖ ద్వారా స్టడీ సర్కిల్‌ను ఏర్పాటు చేస్తామని మంత్రి హామీ ఇచ్చారు. జడ్పీ అధ్యక్షురాలు ఆంగోతు బిందు, ఆర్డీవో కె.కొమురయ్య, అంబేడ్కర్‌ యువజన సంఘం అధ్యక్షుడు కామ సంజీవరావు, సామాజిక గిరిజన అధ్యయన వేదిక వ్యవస్థాపకులు కిషన్‌నాయక్‌ పాల్గొన్నారు.