ఫిబ్రవరి 26న ట్రిపుల్‌ ఐటీ స్నాతకోత్సవం

వేంపల్లె, న్యూస్‌టుడే: రాజీవ్‌గాంధీ వైజ్ఞానిక, సాంకేతిక విశ్వవిద్యాలయం (ఆర్జీయూకేటీ) పరిధిలోని ఇడుపులపాయ, నూజివీడు ట్రిపుల్‌ ఐటీలలో ఆరేళ్ల ఇంజినీరింగ్‌ కోర్సు పూర్తి చేసిన 6000 మంది విద్యార్థులకు స్నాతకోత్సవం నిర్వహించి పట్టాలు ఇవ్వాల్సి ఉంది. ఈ కార్యక్రమాన్ని గతేడాది డిసెంబరు 24న నిర్వహించి ముఖ్యమంత్రి జగన్‌మోహన్‌రెడ్డి చేతులమీదుగా పట్టాలు అందించాలని నిర్ణయించారు. సీఎం బిజీ షెడ్యూల్‌ కారణంగా అప్పుడు వాయిదా పడింది. తిరిగి ఈ ఏడాది జనవరి 30న నిర్వహించాలని నిర్దేశించుకున్నా ప్రస్తుతం కరోనా కేసులు పెరుగుతున్నందున మరో సారి వాయిదా పడింది. కరోనా ఉద్ధృతి కారణంగా స్నాతకోత్సవ తేదీని వచ్చే నెల 26కు వాయిదా వేస్తూ నిర్ణయం తీసుకున్నట్లు వర్సిటీ కులపతి ఆచార్య కేసీరెడ్డి బుధవారం ఓ ప్రకటనలో పేర్కొన్నారు.