కరెంటు లేక కష్టాలు

సామాజిక ఆరోగ్య కేంద్రంలో ఫ్యాన్లు తిరగక రోగుల అవస్థలు

పోలవరం, న్యూస్‌టుడే: అసలే ఎండల తీవ్రతతో ఉక్కిరిబిక్కిరవుతున్న పోలవరం ప్రజలు సోమవారం రాత్రి విద్యుత్తు సరఫరా నిలిచిపోవడంతో నానా అవస్థలు పడ్డారు. జగన్నాథపేట వద్ద పరివర్తకంలో సమస్యతోపాటు పలు చోట్ల తీగలు తెగిపోవడంతో జగన్నాథపేట, కమ్మరగూడెం, నూతనగూడెం ప్రాంతాలకు సరఫరా నిలిచిపోయింది. ఫ్యాన్లు తిరగక ప్రజలు ఉక్కపోతతో తెల్లవార్ల్లూ ఉక్కిరిబిక్కిరయ్యారు. సామాజిక ఆరోగ్య కేంద్రంలోని రోగులు సైతం ఇబ్బందులు పడ్డారు. మోటార్లు పనిచేయకపోవడంతో నీళ్ల కోసం ప్రజలు ఇబ్బందులు పడ్డారు. మంగళవారం మధ్యాహ్నం విద్యుత్తు సరఫరాను తాత్కాలికంగా పునరుద్ధరించారు.