పోలింగ్‌ కేంద్రానికి పచ్చ రంగు

వ్యతిరేకించిన స్థానికులు
ఎట్టకేలకు తెల్ల రంగు

ఏలూరు అర్బన్‌, న్యూస్‌టుడే: కట్టా సుబ్బారావుతోటలో పోలింగ్‌ కేంద్రానికి (సామాజిక భవనం) అధికారులు ఆకుపచ్చ రంగు వేయించారు. అది వైకాపా జెండాలోని రంగుతో పోలినదిగా ఉందని స్థానికులు వ్యతిరేకించారు. నియోజకవర్గ రిటర్నింగ్‌ అధికారి ముక్కంటికి ఫిర్యాదు చేశారు. నగర పాలక సంస్థ కమిషనర్‌ వెంకటకృష్ణ అక్కడికొచ్చారు. స్థానికులతో మాట్లాడారు. నియోజకవర్గ పరిధిలో ఎంపిక చేసిన నాలుగు పోలింగ్‌ కేంద్రాలను నమూనా కేంద్రాలుగా తీర్చిదిద్దుతున్నామని తెలిపారు. మహిళలు, యువత, దివ్యాంగులు, సాధారణ కేటగిరీల వారి కోసం వీటిని ఏర్పాటుచేస్తున్నట్లు వివరించారు. ‘గో గ్రీన్‌- లవ్‌ గ్రీన్‌’ అనే నినాదంతో ఓటర్లకు పచ్చని మొక్కలు పంపిణీ చేస్తామని తెలిపారు. స్థానికులు స్పందిస్తూ వైకాపాకు సంకేతంగా ఉన్న రంగును తొలగించాలని పట్టుబట్టారు. దీంతో తప్పనిసరి పరిస్థితుల్లో ఆకుపచ్చ రంగు  తొలగించి తెల్ల రంగు వేయించారు.