Andhra News: ఈనాడు ఎడిటర్‌కు తెలుగు భాషా పురస్కారం ప్రదానం

విజయవాడ సాంస్కృతికం, న్యూస్‌టుడే: కృష్ణా జిల్లా రచయితల సంఘం ఆధ్వర్యంలో మండలి వెంకట కృష్ణారావు తెలుగు భాషా పురస్కార ప్రదానోత్సవ కార్యక్రమం గురువారం విజయవాడ నగరం గాంధీనగర్‌లోని హోటల్‌ ఐలాపురంలో నిర్వహించారు. ఈ ఏడాది మండలి వెంకట కృష్ణారావు తెలుగు భాషా పురస్కారాన్ని శాసనసభ పూర్వ ఉపసభాపతి మండలి బుద్ధప్రసాద్‌, సమాచార హక్కు చట్టం కమిషనర్‌ ఐలాపురం రాజా, మాజీ ఎమ్మెల్యే తెనాలి శ్రావణ్‌కుమార్‌ చేతుల మీదుగా ఆంధ్రప్రదేశ్‌ ఈనాడు పత్రిక ఎడిటర్‌, ఈనాడు పాత్రికేయ పాఠశాల ప్రిన్సిపల్‌ ఎం.నాగేశ్వరరావుకు అందజేశారు. రచయితల సంఘం ప్రధాన కార్యదర్శి డాక్టర్‌ జి.వి.పూర్ణచంద్‌, ఉపాధ్యక్షుడు గుమ్మా సాంబశివరావు, సభ్యులు డాక్టర్‌ పాలపర్తి శ్యామలానంద ప్రసాద్‌, సిరిపురపు అన్నపూర్ణ, ఎస్‌.శైలజ తదితరులు పాల్గొన్నారు.