దిల్లీ: లోక్‌సభ ఎన్నికల్లో తొలిదశ పోలింగ్‌ 65.5 శాతానికి చేరింది. శుక్రవారం 102 నియోజకవర్గాల్లో నిర్వహించిన పోలింగ్‌లో సుమారు 62.37% మంది ఓటర్లు తమ హక్కు వినియోగించుకున్నట్లు ఎన్నికల సంఘం ప్రాథమిక అంచనాలు వెల్లడించిన విషయం తెలిసిందే. శనివారం మరిన్ని వివరాలు రావడంతో ఇది మూడు శాతానికిపైగా పెరిగినట్లయింది. అస్సాంలో ఐదు లోక్‌సభ స్థానాల్లో 72.10 శాతం మంది ఓటుహక్కు వినియోగించుకున్నట్లు తొలుత చెప్పినా అది 78.25 శాతానికి చేరింది. ఆదివారానికి తుది గణాంకాలను ఈసీ లాంఛనంగా ప్రకటించే అవకాశముంది. పోలింగ్‌ శాతం ఎక్కువేనని, ఇది చాలావరకు ప్రశాంతంగానే జరిగిందని అధికార వర్గాలు తెలిపాయి.