దిల్లీ: లోక్‌సభ ఎన్నికల వేళ పంజాబ్‌లో కాంగ్రెస్‌కు మరో ఎదురుదెబ్బ తగిలింది. ప్రియాంకా గాంధీకి సన్నిహితుడు, కాంగ్రెస్‌ జాతీయ కార్యదర్శి తేజిందర్‌ పాల్‌ సింగ్‌ బిట్టు పార్టీ పదవులతోపాటు కాంగ్రెస్‌ ప్రాథమిక సభ్యత్వానికి రాజీనామా చేశారు. అనంతరం కేంద్ర మంత్రి అశ్వినీ వైష్ణవ్‌, జాతీయ ప్రధాన కార్యదర్శి వినోద్‌ తావ్డేల సమక్షంలో భాజపాలో చేరారు. దివంగత కాంగ్రెస్‌ సీనియర్‌ నేత సంతోఖ్‌ సింగ్‌ చౌదరి భార్య కరమ్‌జీత్‌ కౌర్‌ చౌదరి కూడా భాజపాలో చేరారు. కరమ్‌జీత్‌ చౌదరి గత ఏడాది సిట్టింగ్‌ ఎంపీగా ఉన్న తన భర్త మరణంతో జలంధ]ర్‌ లోక్‌సభ ఉప ఎన్నికల్లో పోటీ చేసి ఓటమి పాలయ్యారు. తేజిందర్‌ సింగ్‌ను పార్టీలోకి ఆహ్వానించిన కేంద్ర మంత్రి అశ్వినీ వైష్ణవ్‌, కాంగ్రెస్‌ ప్రభుత్వ హయాంలో 60 ఏళ్లలో చేసిన అభివృద్ధి కంటే ప్రధాని నరేంద్రమోదీ నాయకత్వంలో చేసిన అభివృద్ధే ఎక్కువని అన్నారు.