సుక్మా: దేశంలో ఎన్నికల పండగ ప్రారంభమైంది. తొలి దశలో భాగంగా మావోయిస్టుల కంచుకోట అయిన ఛత్తీస్‌గఢ్‌లోని బస్తర్‌ నియోజకవర్గంలోనూ పోలింగ్‌ కేంద్రాలను ఏర్పాటుచేశారు. మావోయిస్టులు ఇచ్చిన ఎన్నికల బహిష్కరణ పిలుపును ధిక్కరించి.. ఇక్కడి పలు మారుమూల పల్లెల ఓటర్లు తమ ఓటు హక్కును వినియోగించుకున్నారు. ఒక్క గ్రామంలో తప్ప. అదే పువర్తి. బీజాపూర్‌ జిల్లా సరిహద్దులో, సుక్మా జిల్లా కేంద్రానికి 150 కిలోమీటర్ల దూరంలోని దట్టమైన అటవీ ప్రాంతంలో ఈ గ్రామం ఉంది. బస్తర్‌లో భద్రతా బలగాలపై గతంలో జరిగిన పలు దాడులకు కీలక సూత్రధారిగా భావిస్తున్న మావోయిస్టు నేత హిడ్మా స్వగ్రామం పువర్తి. ఆ గ్రామంలో మొత్తం 332 మంది ఓటర్లు ఉన్నారు. ఈ ప్రాంతం సహా టేకల్‌గుడియం (158 మంది ఓటర్లు), జోనగూడ (157 మంది ఓటర్లు)కు కలిపి పోలింగ్‌ కేంద్రం ఏర్పాటుచేశారు. టేకల్‌గుడియం, జోనగూడ నుంచి కేవలం 31 మంది ఓటు వేయగా.. పువర్తి నుంచి మాత్రం ఒక్కరూ ముందుకురాలేదని తెలుస్తోంది.

అందుకే ఓటింగ్‌కు దూరమా?

ఎన్నికలను బహిష్కరించాలని మావోయిస్టులు పువర్తి పరిసర గ్రామాల్లో బ్యానర్లు ఏర్పాటుచేశారు. ఈ ప్రాంతంలో భద్రతా బలగాలు క్యాంపు ఏర్పాటు చేసినప్పటికీ.. ప్రాణ భయంతోనే గ్రామస్థులంతా ఓటింగ్‌కు దూరంగా ఉన్నట్లు తెలుస్తోంది. ఈ నెల 19న బస్తర్‌లో పోలింగ్‌ జరగ్గా.. 67.56 శాతం ఓటింగ్‌ నమోదైంది. ఇటీవల బస్తర్‌ ప్రాంతంలో భద్రతా బలగాలు, మావోయిస్టుల మధ్య చోటుచేసుకున్న ఎదురుకాల్పుల్లో 29 మంది మావోయిస్టులు ప్రాణాలు కోల్పోయిన సంగతి తెలిసిందే.