మోదీ వ్యాఖ్యలపై ప్రియాంక ఆగ్రహం

త్రిశ్శూర్‌, పథనంథిట్ట: భాజపా నేతృత్వంలోని కేంద్ర ప్రభుత్వం జాత్యాహంకార, నియంతృత్వ, అణచివేత సర్కార్‌గా వ్యవహరిస్తోందని కాంగ్రెస్‌ ప్రధాన కార్యదర్శి ప్రియాంకా గాంధీ శనివారం విమర్శించారు. స్వాతంత్య్రయోధుల రక్తంతో రచించిన భారత రాజ్యాంగాన్ని మారుస్తామంటూ అహంకారపూరితంగా పేర్కొంటోందని ఆక్షేపించారు. సార్వత్రిక ఎన్నికల తొలి దశ పోలింగ్‌లో ఓటర్లు కాంగ్రెస్‌ పార్టీని, ఇండియా కూటమిని తిరస్కరించారంటూ ప్రధాని మోదీ చేసిన వ్యాఖ్యలపై ప్రియాంక మండిపడ్డారు. ఫలితాలు రాకుండా ఫలానా పార్టీని ఓటర్లు తిరస్కరించారంటూ ఎలా చెప్తారని ప్రశ్నించారు. కేరళలో శనివారం నిర్వహించిన ఎన్నికల ప్రచారంలో ఆమె ప్రసంగిస్తూ తాను ఎక్కడికెళ్లినా అక్కడి ప్రజలు మార్పు కోరుకుంటున్నారని, అది కచ్చితంగా జరిగి తీరుతుందన్నారు.