దిల్లీ: రాజస్థాన్‌ సభలో ప్రధాని మోదీ ‘సంపద పంపిణీ’ గురించి మాట్లాడుతూ చేసిన వివాదాస్పద వ్యాఖ్యలపై తాము దిల్లీ పోలీస్‌ కమిషనర్‌కు ఫిర్యాదు చేసినట్లు సీపీఎం సోమవారం వెల్లడించింది. నగరంలోని మందిర్‌ మార్గ్‌ పోలీస్‌స్టేషను ఎస్‌హెచ్‌వో కేసు నమోదుకు తిరస్కరించడంతో నేరుగా ఉన్నతాధికారికి ఫిర్యాదు పంపినట్లు సీపీఎం నేతలు బృందా కారట్‌, పుష్పిందర్‌ సింగ్‌ గ్రేవాల్‌ తెలిపారు. ఒక వర్గాన్ని ప్రభావితం చేసేలా ప్రధాని ద్వేషపూరితమైన వ్యాఖ్యలు చేసినట్లు ఫిర్యాదులో పేర్కొన్నారు. మోదీ ప్రసంగ పాఠాన్ని, యూట్యూబ్‌ లింకును ఫిర్యాదుకు జత చేశారు.