పుణె: మహారాష్ట్ర ఉప ముఖ్యమంత్రి అజిత్‌ పవార్‌ తనయుడు పార్థ్‌ పవార్‌కు లోక్‌సభ ఎన్నికల వేళ మహారాష్ట్ర ప్రభుత్వం ‘వై ప్లస్‌’ భద్రత కల్పించింది. 2019 లోక్‌సభ ఎన్నికల్లో మావల్‌ స్థానం నుంచి ఎన్సీపీ తరఫున పోటీ చేసి ఓటమిపాలైన ఆయన ప్రస్తుతం తన తల్లి సునేత్ర తరఫున చురుగ్గా ప్రచారం చేస్తున్నారు. ఈ నేపథ్యంలో ఆయనకు వై ప్లస్‌ భద్రత కల్పిస్తూ ప్రభుత్వం నిర్ణయం తీసుకున్నట్లు పుణె పోలీస్‌ కమిషనర్‌ అమితేశ్‌కుమార్‌ తెలిపారు. భద్రతా కారణాల దృష్ట్యా పార్థ్‌కు రక్షణ కల్పించినట్లు ఎన్సీపీ నేత ఒకరు తెలిపారు. తాజా పరిణామంపై అజిత్‌ బంధువు, ఎన్సీపీ (శరద్‌చంద్ర పవార్‌) నేత రోహిత్‌ పవార్‌ స్పందించారు. రాజకీయ నాయకుల పిల్లలు, ఎమ్మెల్యేలు, సినీ నటులకు భద్రత కల్పించేందుకే ఉప ముఖ్యమంత్రి, హోం మంత్రి దేవేంద్ర ఫడణవీస్‌ ప్రాధాన్యం ఇస్తున్నారని పేర్కొన్నారు. సామాన్యుల భద్రతను విస్మరిస్తున్నారని విమర్శించారు.