నేడు 14 నియోజకవర్గాల్లో తొలివిడత
రెండు కూటములకూ కీలక సమరం

ఈనాడు, బెంగళూరు: కేంద్రంలో భాజపా, రాష్ట్రంలో కాంగ్రెస్‌ అధికారంలో ఉన్న కన్నడసీమలో లోక్‌సభ ఎన్నికల తొలిదశ సమరం రెండు పార్టీలకూ ప్రతిష్ఠాత్మకంగా మారింది. అసెంబ్లీ పోరు సాగిన ఏడాదిలోపే రెండు ప్రధాన పార్టీలూ మరోసారి తలపడుతున్నాయి. కాకపోతే ఆ ఎన్నికల్లో త్రిముఖ పోరు సాగితే ఇప్పుడు ద్విముఖ పోరే. అప్పట్లో జేడీ-ఎస్‌ విడిగా పోటీచేయగా ఈసారి భాజపాతో జట్టుకట్టి, ఉనికి చాటేందుకు పోరాడుతోంది. గత సార్వత్రిక ఎన్నికల్లో గెలుచుకున్న 25 స్థానాలను మళ్లీ సాధించుకోవాలని భాజపా, ఈ లక్ష్యానికి గంటికొట్టాలని కాంగ్రెస్‌ అన్నివిధాలా ప్రయత్నిస్తున్నాయి. మోదీ గ్యారంటీల పేరుతో భాజపా, ఐదు గ్యారంటీలంటూ కాంగ్రెస్‌.. ప్రచారం పూర్తిచేశాయి. 14 స్థానాల్లో కాంగ్రెస్‌ అన్నిచోట్లా పోటీ చేస్తుండగా ఎన్డీయే పక్షాలుగా భాజపా 11 చోట్ల, జేడీ-ఎస్‌ మూడుచోట్ల బరిలో ఉన్నాయి. గతసారి ఈ 14లో కాంగ్రెస్‌, జేడీ-ఎస్‌ ఒక్కో స్థానాన్నే గెలుచుకోగా మిగిలినవి భాజపా పరమయ్యాయి. ఈసారి బరిలో ఉన్న ప్రముఖుల్లో హెచ్‌.డి.కుమారస్వామి, శోభా కరంద్లాజె, సి.ఎన్‌.మంజునాథ, యదువీర్‌ కృష్ణదత్త చామరాజ వడియార్‌, డి.కె.సురేశ్‌, తేజస్వీసూర్య తదితరులు ఉన్నారు.

భాజపా: సామాజిక అస్త్రాలు

ప్రచారం కోసం ప్రధాని నాలుగుసార్లు రాష్ట్రానికి వచ్చి.. గత ఐదేళ్లలో అందించిన నిధులు, చేపట్టిన అభివృద్ధి పథకాలపై విస్తృత ప్రచారం చేశారు. కాంగ్రెస్‌ హామీలు ఆచరణ సాధ్యం కానివంటూ- భాజపా గ్యారంటీలపై విశ్వాసాన్ని నింపే ప్రయత్నం చేశారు. బెంగళూరులో చివరి పర్యటనలో సామాజిక అస్త్రాలను సంధించారు. స్వేచ్ఛగా ప్రార్థనలు చేయలేని స్థితిలో హిందువులు ఉంటారని, కాంగ్రెస్‌ వంటి ప్రమాదకారి పార్టీకి అవకాశం ఇవ్వొద్దని హెచ్చరించారు.

కాంగ్రెస్‌: అభయ హస్తం

రాష్ట్రంలో అధికారంలోకి వచ్చిన తర్వాత అమలుచేసిన ఐదు గ్యారంటీలనే కాంగ్రెస్‌ ఈ ఎన్నికలకు రక్షగా భావిస్తోంది. జాతీయ స్థాయిలో ప్రకటించిన 25 గ్యారంటీలనూ ఈ ఎన్నికల్లో ప్రచారం చేసింది. పది నెలలుగా అమలుచేసిన పథకాల లబ్ధిదారులను విస్తృతంగా ప్రచారం చేసింది. ఎన్‌డీయే సర్కారు పదేళ్లలో రాష్ట్రానికి ఇచ్చింది శూన్యమంటూ ఖాళీ చెంబుతో ప్రచారం చేసింది. లౌకికవాదాన్ని పార్టీ విధానంగా ప్రకటించుకునే జేడీ-ఎస్‌.. భాజపాతో చేయి కలపటాన్ని విమర్శిస్తూ మైనారిటీల ఓట్లను రాబట్టుకునేందుకు ప్రయత్నిస్తోంది.

ఎన్డీయే: దళపతులకు అండ

2019 ఎన్నికల్లో అప్పటి విపక్ష పార్టీలైన కాంగ్రెస్‌, జేడీ-ఎస్‌ సమాజంలో తీవ్రవాదాన్ని పెంచి పోషిస్తున్నాయని మోదీ ఆరోపించారు. ఈ ఎన్నికల్లో పరిస్థితి మారిపోయింది. 92 ఏళ్ల వయసులోనూ తాను ఎన్నికల ప్రచారంలో పాల్గొనేది మోదీని మళ్లీ ప్రధానిగా చూడడానికే అంటూ మాజీ ప్రధాని దేవెగౌడ ఇటీవల భావోద్వేగానికి లోనయ్యారు. తన లక్ష్యం కాంగ్రెస్‌ను ఓడించటమేనని ప్రచారం చేసిన జేడీ-ఎస్‌.. ఈ ఎన్నికల్లో మూడింటిలో కనీసం రెండైనా సాధించాలని చూస్తోంది.

తొలి విడత ఇలా..

మొత్తం స్థానాలు: 14

• నియోజకవర్గాలు: ఉత్తర, కేంద్ర, దక్షిణ, గ్రామీణ బెంగళూరు; ఉడుపి - చిక్కమగళూరు, హాసన, దక్షిణ కన్నడ, చిత్రదుర్గ, తుమకూరు, మండ్య, మైసూరు, చామరాజ నగర, చిక్కబళ్లాపుర, కోలారు
• పోలింగ్‌ కేంద్రాలు : 30,602
• ఓటర్లు : 2,88,19,342
• పురుషులు : 1,44,28,099
• మహిళలు : 1,43,88,176
• ఇతరులు  : 3,067
• అభ్యర్థులు : 247 (పురుషులు - 226, మహిళలు-21)