మహిళలకు సీట్ల కేటాయింపు తీరిది

ఈనాడు, దిల్లీ: చట్టసభల్లో మహిళలకు 33% రిజర్వేషన్లు కల్పించే బిల్లు పార్లమెంటు ఆమోదముద్రతో చట్ట రూపం సంతరించుకున్నా రాజకీయ పార్టీలు మాత్రం ఆ దారిలో నడవడంలేదు. భాజపా, కాంగ్రెస్‌లు ప్రస్తుత లోక్‌సభ ఎన్నికల్లో పోటీ చేయడానికి మహిళలకు కల్పించిన అవకాశాలు ఈ విషయాన్ని చెబుతున్నాయి. భాజపా ఇప్పటివరకు ప్రకటించిన 436మంది అభ్యర్థుల్లో 70 మంది మహిళలకు, కాంగ్రెస్‌ ప్రకటించిన 317 మంది అభ్యర్థుల్లో 41మంది మహిళలకు సీట్లు కేటాయించాయి. భాజపా    16.05% అబలలకు అవకాశమిస్తే, కాంగ్రెస్‌ 12.93% మందికి లోక్‌సభ ఎన్నికల్లో పోరాడే వీలు కల్పించింది.  బహుశా 2029 ఎన్నికల నాటికి మహిళా రిజర్వేషన్లు అమల్లోకి రావొచ్చన్న అంచనా ఉంది.