పుణె: కొవిడ్‌ కష్టకాలంలో ప్రధాని మోదీ దేశంలో టీకాల తయారీకి అనుమతించి, అందరికీ అందించడంతోనే నేడు భారతీయులంతా బతికున్నారని మహారాష్ట్ర ఉప ముఖ్యమంత్రి దేవేంద్ర ఫడణవీస్‌ తెలిపారు. శనివారం  మహారాష్ట్రలోని సాంగ్లీ ఎన్నికల సభలో ఆయన మాట్లాడుతూ.. ఇలాగే దాదాపు వంద దేశాలకు మన వ్యాక్సిన్‌ డోసులను అందించి ఆయా ప్రాంతాల ప్రజల ప్రాణాలను కాపాడిన ఘనత మోదీకి చెందుతుందన్నారు. తాను ఇటీవల మారిషస్‌కు వెళ్లగా, వ్యాక్సిన్‌ డోసులను అందించి తమ దేశ ప్రజల జీవితాలను కాపాడిన మోదీకి కృతజ్ఞతలు చెప్పాలని ఆ దేశాధ్యక్షుడు తనను కోరినట్లు తెలిపారు. మోదీని ప్రజలు మళ్లీ ఆశీర్వదించడానికి ఈ ఒక్క కారణం చాలన్నారు.