తూర్పు దిల్లీలో ఆప్‌ అభ్యర్థి తరఫున ప్రచారం

దిల్లీ: ఆమ్‌ ఆద్మీ పార్టీ (ఆప్‌) జాతీయ కన్వీనర్‌, దిల్లీ ముఖ్యమంత్రి కేజ్రీవాల్‌ మద్యం కుంభకోణం కేసులో అరెస్టై జైలులో ఉన్న నేపథ్యంలో ఆయన సతీమణి సునీతా కేజ్రీవాల్‌ ఆ పార్టీ ఎన్నికల ప్రచార బాధ్యతలను చేపట్టారు. ఆమె శనివారం తూర్పు దిల్లీ లోక్‌సభ స్థానంలో ఆప్‌ అభ్యర్థి కుల్దీప్‌ కుమార్‌ తరఫున తొలి రోడ్‌షో నిర్వహించారు. వాహనంపై నిలుచున్న సునీత చేతులు జోడించి ఓటర్లకు అభివాదం చేస్తూ దిల్లీ వీధుల్లో ముందుకు సాగారు. దారిపొడవునా ప్రజలు భారీగా గుమిగూడారు. స్థానికులు భవనాలపైకి ఎక్కి ఆసక్తిగా తిలకించారు. దిల్లీ సీఎం కేజ్రీవాల్‌ సింహం లాంటి వారని, ఆయనను ఎవరూ ఓడించలేరని సునీత పేర్కొన్నారు. పాఠశాలలు నిర్మించి, ఉచిత విద్యుత్‌ అందించి, మొహల్లా క్లినిక్‌లను తెరవడం వంటి ఎన్నో మంచి పనులు చేసినందుకే కేజ్రీవాల్‌ను అరెస్టు చేశారని ఆరోపించారు. ప్రజాస్వామ్యాన్ని రక్షించుకోవడానికి, నియంత పాలనను గద్దె దింపడానికి ఓటు వేయాలంటూ ప్రజలకు విజ్ఞప్తి చేశారు. జైలులో ఉన్న కేజ్రీవాల్‌ ఆరోగ్యాన్ని దెబ్బ తీయడానికే ఆయనకు ఇన్సులిన్‌ నిలిపి వేశారని ఆరోపించారు. బెదిరింపులకు తన భర్త లొంగబోరని స్పష్టం చేశారు.