అందులో మేజిక్‌ ఏమీలేదు
కేంద్ర మాజీమంత్రి పి.చిదంబరం

కోల్‌కతా: గణాంకాలపరంగా అనివార్యమైన ఒక అంశాన్ని ఎన్నికల వాగ్దానంగా మలచి అతిశయోక్తులతో చెప్పడంలో ప్రధాని మోదీ ఆరితేరారని కాంగ్రెస్‌ పార్టీ సీనియర్‌ నేత పి.చిదంబరం విమర్శించారు. ప్రధాన మంత్రి పదవిలో ఎవరున్నా సరే మన దేశం ప్రపంచంలోనే మూడో అతిపెద్ద ఆర్థిక వ్యవస్థగా అవతరించడం ఖాయమని తెలిపారు. అత్యధిక జనాభా కలిగిన దేశంగా మనం ఆ స్థాయికి చేరడంలో మేజిక్‌ ఏమీ ఉండదని పేర్కొన్నారు. అయితే, ఎంత సమయంలో ఆ స్థాయిని అందుకుంటామనేది ముఖ్యమని ‘పీటీఐ’ వార్తా సంస్థకు ఇచ్చిన ఇంటర్వ్యూలో కేంద్ర ఆర్థికశాఖ మాజీ మంత్రి అన్నారు. స్థూల జాతీయోత్పత్తి (జీడీపీ) ఆధారంగా మన దేశం ఇప్పుడు ప్రపంచంలో అయిదో అతిపెద్ద ఆర్థిక వ్యవస్థగా ఉంది. అమెరికా, చైనా, జపాన్‌, జర్మనీ దేశాలు మనకన్నా ముందున్నాయి. ‘జీడీపీ పరంగా 2004లో భారత్‌ ప్రపంచంలో 12వ స్థానంలో ఉంది. 2014 నాటికి ఏడో స్థానానికి చేరుకుంది. 2024లో ఐదో స్థానంలో నిలిచింది. ఇప్పుడు కూడా ప్రధానిగా ఎవరున్నా.. మూడో స్థానానికి చేరుకుంటుంది. ఇందులో ఎటువంటి మాయాజాలం లేదు. మనకున్న జనాభాతోనే ఇది సాధ్యమవుతుంది’’ అని చిదంబరం పేర్కొన్నారు. అయితే, ఒక దేశ ప్రజల మెరుగైన జీవన ప్రమాణాలకు నిజమైన కొలమానం జీడీపీ కాబోదని, తలసరి ఆదాయమే అసలైన గీటురాయని చిదరంబరం అభిప్రాయపడ్డారు. భారతీయుల తలసరి ఆదాయం(2,731 అమెరికా డాలర్లు) గ్లోబల్‌ ర్యాంకుల పరంగా 136వ స్థానంలో ఉందని అంతర్జాతీయ ద్రవ్య నిధి (ఐఎంఎఫ్‌) 2024 అంచనాలను ఉటంకిస్తూ గుర్తు చేశారు.