ఈనాడు, బెంగళూరు: ‘‘ప్రధానమంత్రి నరేంద్ర మోదీ నోరెత్తితే అల్పసంఖ్యాకులు, పేదల గురించి మాట్లాడుతుంటారు. దేశంలోని ఆస్తులను పిల్లలు ఎక్కువగా ఉండేవారికి పంచుతారంటూ కాంగ్రెస్‌పై ఆరోపణలు చేస్తుంటారు. ఎక్కువమంది పిల్లలను కనే సామర్థ్యం పేదలకే ఉంటుంది’’ అని ఏఐసీసీ అధ్యక్షుడు మల్లికార్జున ఖర్గే వ్యాఖ్యానించారు. మంగళవారం రాత్రి కలబురగి జిల్లాలోని వాడిలో ఎన్నికల ప్రచారంలో ఆయన మాట్లాడారు. దేశంలో ఏ పేద కుటుంబాన్ని చూసినా నలుగురైదుగురు పిల్లలుంటారని చెప్పారు. ‘‘ఏం చేద్దాం.. అధిక సంతానం పుట్టించే సామర్థ్యం వారికే ఉంది. ఆ సత్తా మీకు లేదంటే అందుకు మేమేం చేసేది’’ అంటూ మోదీ విమర్శలకు బదులిచ్చారు. ఈ దేశాన్ని నిర్మించటంలో పేదల శ్రమ ఉందని గుర్తుచేశారు. మోదీకి పేదలు, అల్పసంఖ్యాకులంటే గిట్టదన్నారు. రాజ్యాంగాన్ని రద్దు చేస్తామని ఆర్‌ఎస్‌ఎస్‌ నేతలు, భాజపా ఎంపీలు బహిరంగంగానే చెబుతుంటారని ఖర్గే తెలిపారు. ‘‘రాజ్యాంగం కేవలం రిజర్వేషన్ల కోసమే రచించింది కాదు. అది దేశంలో ప్రతి వ్యవస్థను నడిపించే ఓ పెద్ద గ్రంథం. ఎన్నికల సమయంలో తప్పుడు హామీలిచ్చే భాజపా కాకుండా హామీలు నెరవేర్చే కాంగ్రెస్‌తోనే దేశ ప్రగతి సాధ్యం’’ అన్నారు.