హరియాణా సరికొత్త పంథా

చండీగఢ్‌: యువ ఓటర్లు తమ ఓటు హక్కును వినియోగించుకునేలా ప్రోత్సహించేందుకు హరియాణా వినూత్న చర్య చేపట్టింది. ఓటు ఆవశ్యకతను తెలియజేసే పాటలతో యువతను చైతన్యవంతులను చేసేలా ప్రత్యేక మ్యూజిక్‌ బ్యాండ్లతో ప్రదర్శనలు ఏర్పాటు చేస్తున్నట్లు ఎన్నికల ప్రధానాధికారి అనురాగ్‌ అగర్వాల్‌ తెలిపారు. యువ ఓటర్లు అధికంగా ఉన్న జిల్లాల్లో ఈ బ్యాండ్లను ఏర్పాటు చేసి ఓటేసేలా వారిలో జోష్‌ నింపుతామని తెలిపారు. దీంతోపాటు ‘ఓటర్స్‌ ఇన్‌ క్యూ’ అనే యాప్‌ను రూపొందించి వివాహ ఆహ్వానాల మాదిరిగా ఓటర్లకు పోలింగ్‌ ఆహ్వానాలు పంపుతున్నామని, ఈ యాప్‌ ద్వారా పోలింగ్‌ కేంద్రం వద్ద రద్దీ, ఓటేయడానికి అనుకూలమైన సమయం తదితర సమాచారాన్ని పొందవచ్చని పేర్కొన్నారు. హరియాణాలో 10 ఎంపీ స్థానాలకు మే 25న ఎన్నికలు జరగనున్నాయి.