దిల్లీ: ఉత్తర్‌ప్రదేశ్‌లోని అమేఠీ, రాయ్‌బరేలీ స్థానాలకు కాంగ్రెస్‌ అభ్యర్థులు ఎవరనేది 24 నుంచి 30 గంటల్లో ప్రకటిస్తామని ఏఐసీసీ ప్రధాన కార్యదర్శి జైరాం రమేశ్‌ తెలిపారు. ఈ నియోజకవర్గాల్లో పోటీ చేసేందుకు కాంగ్రెస్‌ అగ్రనేతలు భయపడుతున్నారని వస్తున్న విమర్శలపై బుధవారం విలేకరుల సమావేశంలో ఆయన స్పందించారు. ‘‘అభ్యర్థులుగా ఎవరిని ఖరారు చేయాలనే నిర్ణయాధికారాన్ని పార్టీ కేంద్ర ఎన్నికల కమిటీ (సీఈసీ) ఇప్పటికే అధ్యక్షుడు మల్లికార్జున ఖర్గేకు అప్పగించింది. ఇక్కడ ఎవరూ భయపడటం లేదు.. పారిపోవడం లేదు. జాప్యమేమీ లేదు. 3వ తేదీ వరకు సమయం ఉంది. చర్చలు జరుగుతున్నాయి. ఖర్గే ఒక నిర్ణయానికి వచ్చేవరకు ఎలాంటి తప్పుడు సమాచారాన్ని నమ్మవద్దు’’ అని కోరారు.

రాయ్‌బరేలీ నుంచి రాహుల్‌?

రాహుల్‌ ఈసారి రాయ్‌బరేలీ నుంచి పోటీ చేసే అవకాశం ఉందని, తుది నిర్ణయాన్ని సోనియా కుటుంబం ఇంకా తీసుకోవాల్సి ఉందని పార్టీ వర్గాల సమాచారం. ప్రియాంక కూడా అదేచోట నుంచి పోటీ చేసేందుకు ఆసక్తి కనపరుస్తున్నారని, రాహుల్‌ మాత్రం ఆ ప్రతిపాదనకు సానుకూలంగా లేరని అంటున్నారు. గాంధీ కుటుంబం నుంచి ముగ్గురు సభ్యులు పార్లమెంటులో ఉండడాన్ని ఆయన కోరుకోవడం లేదని ఆ వర్గాలు వివరిస్తున్నాయి. బుధవారం ఒక సమావేశం జరిగినా తుది నిర్ణయానికి రాలేకపోయారు.