రాహుల్‌గాంధీ ధ్వజం

దిల్లీ: సార్వత్రిక ఎన్నికల్లో భాజపా కూటమికి ఓటమి అనివార్యమని తేలిపోవడంతో ప్రధాని మోదీ నిరాశా నిస్పృహలకు లోనై ఆ పదవి హుందాతనాన్ని మరచిపోయి మాట్లాడుతున్నారని కాంగ్రెస్‌ అగ్రనేత రాహుల్‌గాంధీ ఆరోపించారు. మహిళల మంగళసూత్రాలను, ప్రజల ఇంటి నుంచి గదులను, గేదెలను లాక్కొనిపోతారని ఏవేవో అర్థంపర్థం లేని మాటలు చెబుతున్నారని ‘ఎక్స్‌’లో ధ్వజమెత్తారు. తదుపరి ప్రభుత్వాన్ని కాంగ్రెస్‌ ఏర్పాటు చేయడం ఖాయమని తెలిశాక మోదీ ఒక అబద్ధాల యంత్రంలా తయారయ్యారని చెప్పారు. కోటీశ్వరులైన స్నేహితుల కోసం మోదీ సర్కారు వృథా చేసిన డబ్బును ఇండియా కూటమి సర్కారు తిరిగి ప్రజలకు ఇస్తుందని తెలిపారు. కర్ణాటకలో మహిళలపై హేయమైన అఘాయిత్యాల విషయంలో ఎప్పటిమాదిరిగానే మోదీ నిస్సిగ్గుగా మౌనం దాల్చారని, ‘మోదీ రాజకీయ కుటుంబం’లో ఉన్నవారు నేరగాళ్లయినా వారికి రక్షణ మాత్రం ‘గ్యారంటీ’గా లభిస్తుందని విమర్శించారు. అనేక ఘటనల్లో నేరగాళ్లకు ప్రధాని మౌనంగా అండగా నిలుస్తున్నారని ఆరోపించారు.