ధుబరీ: అస్సాంలో మాఫియా రాజ్యమేలుతోందని, ముఖ్యమంత్రి హిమంత బిశ్వశర్మ అనేక కుంభకోణాల్లో ఇరుక్కుపోయారని ఏఐసీసీ ప్రధాన కార్యదర్శి ప్రియాంక గాంధీ ఆరోపించారు. కాంగ్రెస్‌ని ఓడించడానికి భాజపాకి తెలంగాణలో మజ్లిస్‌ నేత అసదుద్దీన్‌ ఒవైసీతో రహస్య ఒప్పందం ఉందని, అదే రీతిలో ఆలిండియా యునైటెడ్‌ డెమోక్రటిక్‌ ఫ్రంట్‌ (ఏఐయూడీఎఫ్‌)కు చెందిన బహ్రుద్దీన్‌ అజ్మల్‌తోనూ అస్సాంలో బిశ్వశర్మకు అవగాహన ఉందని చెప్పారు. బుధవారం అస్సాంలోని ధుబరీ జిల్లా బలాజన్‌లో ఎన్నికల సభలో ఆమె ప్రసంగించారు. భూములు, ఇసుక, పోకచెక్కలు, బొగ్గు సహా అన్ని రంగాల్లో మాఫియాయే నడుస్తోందని చెప్పారు. అభివృద్ధి తప్ప అన్ని స్కాంలూ ఇక్కడే జరుగుతున్నాయన్నారు. కాంగ్రెస్‌లో ఉన్నప్పుడే శర్మపై అనేక ఆరోపణలు ఉన్నాయని, భాజపాలో చేరాక అవన్నీ వాషింగ్‌మెషీన్‌లో శుభ్రమైపోయాయని వ్యంగ్యంగా అన్నారు. కేంద్రంలో ప్రధాని మోదీ, అస్సాంలో బిశ్వశర్మ కేవలం కోటీశ్వరుల కోసమే ప్రభుత్వాలు నడుపుతున్నారని, మహిళల భద్రతను గాలికి వదిలేశారని విమర్శించారు. పదేళ్లలోనే ప్రపంచంలో ధనిక పార్టీగా భాజపా మారిందని, 70 ఏళ్లలో కాంగ్రెస్‌ కూడా అంత ఆర్జించలేదని చెప్పారు. ప్రపంచ దేశాలన్నీ తిరిగే మోదీ మన దేశంలో, కనీసం వారణాసి నియోజకవర్గంలోనైనా ఒక్క ఇంటిని సందర్శించారా అని ప్రశ్నించారు. శ్వేత, హరిత విప్లవాలను కాంగ్రెస్‌ తీసుకువస్తే భాజపా మాత్రం విద్వేష విప్లవం తెచ్చిందని దుమ్మెత్తిపోశారు.