పుణె: భారత రాజ్యాంగ మౌలిక సూత్రాలైన లౌకికతత్వం, ప్రాథమిక హక్కులు వంటి వాటిని  పార్లమెంటు సహా ఏ పార్టీ, నాయకుడూ మార్చలేరని కేంద్ర మంత్రి నితిన్‌ గడ్కరీ పేర్కొన్నారు. రాజ్యాంగాన్ని మార్చేందుకు భాజపా ప్రణాళికలు రచిస్తోందన్న కాంగ్రెస్‌ ఆరోపణలు నిరాధారమైనవని కొట్టిపాడేశారు. పశ్చిమ మహారాష్ట్రలోని మాన్‌ తహసీల్‌లో శుక్రవారం ఆయన ఎన్నికల ప్రచారంలో పాల్గొన్నారు. ఈ సందర్భంగా మాట్లాడుతూ.. ప్రస్తుత ప్రతిపక్ష పార్టీ గతంలో అధికారంలో ఉన్నప్పుడు అనేకసార్లు రాజ్యాంగాన్ని సవరించిందని గుర్తుచేశారు. ‘‘డాక్టర్‌ బాబాసాహెబ్‌ అంబేడ్కర్‌ రచించిన భారత రాజ్యాంగాన్ని మార్చేందుకు భాజపా ప్రయత్నిస్తోందంటూ వారు ప్రచారం చేస్తున్నారు. కానీ, రాజ్యాంగాన్ని మార్చలేం’’ అని స్పష్టంచేశారు. ‘‘భావప్రకటనా స్వేచ్ఛ, ప్రాథమిక హక్కులు, ప్రజాస్వామ్యం, లౌకికతత్వం సహా రాజ్యాంగ మౌలిక సూత్రాలను ఏ నాయకుడు, పార్టీ లేదా పార్లమెంటు సవరించలేదని సుప్రీంకోర్టు రూలింగ్‌ ఇచ్చింది’’ అని పేర్కొన్నారు.