పట్నా: ఆర్జేడీ కంచుకోట, గతంలో బిహార్‌ మాజీ ముఖ్యమంత్రి లాలూప్రసాద్‌ యాదవ్‌ ప్రాతినిధ్యం వహించిన సారణ్‌ నుంచి ఆయన కుమార్తె రోహిణీ ఆచార్య ఈసారి పోటీలో ఉన్నారు. అదే స్థానం నుంచి రాష్ట్రీయ జన సంభావన పార్టీ నుంచి లాలూప్రసాద్‌ యాదవ్‌ అన్న పేరున్న వ్యక్తి బరిలో ఉన్నారు. ఏప్రిల్‌ 26న నామినేషన్‌ వేశారు. దాంతో రోహిణి, లాలూల మధ్య పోటీ నెలకొంది. అయితే ఇలా ఎన్నికల్లో పోటీ చేయడం ఈ లాలూకు కొత్తేం కాదు. సారణ్‌లోని రహిమ్‌పుర్‌ గ్రామానికి చెందిన ఆయన వ్యవసాయం చేస్తూనే సామాజిక సేవలో పాల్గొంటున్నారు. ఆర్జేడీ అధ్యక్షుడు లాలూ ప్రసాద్‌ యాదవ్‌ పేరే కలిగి ఉండి గతంలోను పలుమార్లు ఎన్నికల్లో పోటీ చేయడంతో చాలామంది గందరగోళానికి గురయ్యారు.