హిందువుల్లో భయం కలిగించేందుకు మోదీ ప్రయత్నం : ఫరూక్‌ అబ్దుల్లా

శ్రీనగర్‌: అధికారంలో ఉండడం కోసం హిందువుల్లో భయం సృష్టించాలని ప్రధాని నరేంద్రమోదీ ప్రయత్నిస్తున్నారని నేషనల్‌ కాన్ఫరెన్స్‌ అధ్యక్షుడు ఫరూక్‌ అబ్దుల్లా ఆరోపించారు. ‘మహిళల మంగళసూత్రాలను లాక్కొనిపోయి ముస్లింలకు ఆ డబ్బు ఇచ్చేస్తారని మోదీ చెబుతున్నారు. మేం మా తల్లులు, సోదరీమణుల మంగళసూత్రాలను లాక్కొనేటంత దుష్టులమా?’ అని ప్రశ్నించారు. శనివారం శ్రీనగర్‌లో ఎన్నికల సభలో ఆయన ప్రసంగించారు. ‘ప్రస్తుత ఎన్నికల్లో ఇండియా కూటమి గెలిచి అధికారంలోకి వస్తే హిందువుల పొదుపు మొత్తాలపై పన్ను పడుతుందని, వారికి రెండు ఇళ్లు ఉన్నట్లయితే ఒకదానిని తీసుకుని ముస్లింలకు ఇచ్చేస్తారని మోదీ చెబుతున్నారు. ముస్లింల పట్ల హిందువుల్లో ద్వేషాన్ని కలిగిస్తున్నారు. ముస్లింలకు ఎక్కువమంది పిల్లలు ఉంటారని ఆయన చెబుతున్నారు. సంతానమే లేని ఆయనకు పిల్లల గురించి ఏం తెలుసు? తన సొంత భార్యకూ ఆయన విలువ ఇవ్వరు. ఇక పిల్లలకు ఏం విలువనిస్తారు?’ అని అబ్దుల్లా తీవ్ర వ్యాఖ్యలు చేశారు.