బొడేలీ, వంసదా (గుజరాత్‌): ప్రస్తుత సార్వత్రిక ఎన్నికల్లో కాంగ్రెస్‌ అగ్రనేత రాహుల్‌గాంధీ రెండు స్థానాల నుంచి బరిలో దిగడంపై కేంద్ర హోంమంత్రి అమిత్‌ షా విమర్శలు గుప్పించారు. రాయ్‌బరేలీలో రాహుల్‌ భారీ తేడాతో ఓడిపోవడం ఖాయమంటూ జోస్యం చెప్పారు. గుజరాత్‌లోని ఛోటా ఉదయ్‌పుర్‌ జిల్లా బొడేలీ పట్టణంలో శనివారం నిర్వహించిన ప్రచార సభలో ఆయన ప్రసంగించారు. ‘‘2019 నాటి ఎన్నికల్లో అమేఠీలో ఓడిపోవడం ఖాయమని తేలడంతో రాహుల్‌ వయనాడ్‌లోనూ పోటీ చేశారు. ఇప్పుడు వయనాడ్‌లో పరాజయం తప్పదని గ్రహించి రాయ్‌బరేలీ బరిలో దిగారు. రాహుల్‌ అర్థం చేసుకోవాల్సిన విషయం ఏంటంటే.. సమస్య ఆయనలోనే ఉంది తప్ప.. సీట్లలో కాదు’’ అని పేర్కొన్నారు. ఆమ్‌ ఆద్మీ పార్టీ (ఆప్‌)ని అమిత్‌ షా తీవ్రంగా విమర్శించారు. దాన్ని ‘అర్బన్‌ నక్సల్‌ పార్టీ’గా పేర్కొన్నారు. గుజరాత్‌లోని వంసదాలో ఏర్పాటుచేసిన సభలో ఆయన మాట్లాడారు.