బోల్పుర్‌: పశ్చిమబెంగాల్‌ ప్రతిష్ఠను దెబ్బతీసేందుకే సందేశ్‌ఖాలీ ఘటనలపై భాజపా అసత్య ప్రచారం చేసిందని ముఖ్యమంత్రి మమతా బెనర్జీ మండిపడ్డారు. డబ్బుల ఆశ చూపి టీఎంసీ నాయకులపై ఆరోపణలు చేయించేందుకు కుట్రపన్నిందని, ఓటర్లను మభ్యపెట్టేందుకు యత్నించిందని దుమ్మెత్తిపోశారు. ఇటీవల వెలుగులోకి వచ్చిన వీడియోతో వారి కుట్ర బయటపడిందని.. ఇకనైనా ప్రధాని మోదీ మొసలి కన్నీరు కార్చడం మానాలని తీవ్ర వ్యాఖ్యలు చేశారు. లోక్‌సభ ఎన్నికల్లో భాగంగా ఆదివారం ఆమె బోల్పుర్‌ స్థానంలో ప్రచారం చేశారు. ఈ సందర్భంగా మాట్లాడుతూ.. పచ్చి అబద్ధాలకు భాజపా పెట్టింది పేరని దుయ్యబట్టారు.