తాను నృత్యం చేస్తున్నట్లు రూపొందించిన యానిమేటెడ్‌ వీడియోకు ప్రధాని ప్రశంస

దిల్లీ: లోక్‌సభ ఎన్నికల ప్రచారంతో క్షణం తీరికలేకుండా ఉన్న ప్రధానమంత్రి నరేంద్రమోదీని సోషల్‌ మీడియాలో చక్కర్లు కొడుతున్న వీడియో ఒకటి ఆకర్షించింది. జనాలతో కిక్కిరిసిపోయిన మైదానంలో వేదికపై మోదీ ఓ హుషారైన పాటకు నృత్యం చేస్తుండగా, జనాలు కేరింతలు కొడుతూ ఊగిపోతున్నట్లు ఆ వీడియోలో ఉంది. ‘‘ఈ వీడియోను పోస్ట్‌ చేయడం వల్ల నియంత నన్ను అరెస్టు చేయించరని భావిస్తున్నందునే పోస్టు చేస్తున్నాను’’ అని వీడియోను పోస్ట్‌ చేసిన ట్విటర్‌ హ్యాండిల్‌లో సందేశం కనిపించింది. ఈ ట్వీట్‌ను రీ పోస్ట్‌ చేసిన మోదీ ‘‘మీ అందరి లాగానే.. నా నృత్యాన్ని నేనూ ఆస్వాదించాను. ఎన్నికలు కీలక దశలో ఉన్న సమయంలో ఇటువంటి సృజనాత్మకత నిజంగా సంతోషాన్నిస్తుంది’’ అన్న సందేశాన్ని జోడించారు.