దిల్లీ: భారత్‌ రైల్వే వ్యవస్థను ఉద్దేశిస్తూ కాంగ్రెస్‌ అగ్రనేత రాహుల్‌ గాంధీ (Rahul Gandhi) కేంద్రంలోని మోదీ సర్కార్‌పై విమర్శలు గుప్పించారు. భాజపా పాలనలో రైళ్లలో ప్రయాణించడం సామాన్యులకు శిక్షగా మారిందన్నారు. దేశ రైల్వే వ్యవస్థ స్థితి పేలవంగా ఉందని ప్రధాని నిరూపించేందుకు ప్రయత్నిస్తున్నారని ‘ఎక్స్’ (ట్విటర్) వేదికగా ఆరోపించారు.

కొందరు ప్రయాణికులు రైల్లోని టాయిలెట్‌ గది, సీట్లు సరిపోక ఫ్లోర్‌పై కూర్చొని ఉన్న వీడియోను షేర్‌ చేసిన రాహుల్‌.. మోదీ ప్రభుత్వంపై విరుచుకుపడ్డారు. ‘‘ ప్రధాని పరిపాలనలో రైల్లో ప్రయాణించడం సామాన్యులకు శిక్షగా మారింది. రైల్వేల పరిస్థితిపై చెడు అభిప్రాయాన్ని కలిగించేందుకు మోదీ ప్రయత్నిస్తున్నారు. తన స్నేహితులకు వీటిని విక్రయించేందుకు దీని సాకుగా చూపించాలనుకుంటున్నారు’’ అని ఆరోపించారు.

జీతం తక్కువైనా ఐఏఎస్‌ కావాలని ఎందుకనుకుంటారో...ఓ సీఏ పోస్టు వైరల్‌

‘‘సామాన్యులు ప్రయాణించే జనరల్‌ బోగీలను తగ్గించి ఉన్నత వర్గాల రైళ్లనే కేంద్ర ప్రభుత్వం ప్రోత్సహిస్తోంది. మోదీ హయాంలో ప్రతి కేటగిరి ప్రయాణికులు ఇబ్బందులకు గురవుతున్నారు. టికెట్లు ఉన్నప్పటికీ తమ సీట్లలో కూర్చొని ప్రయాణించలేకపోతున్నారు. సామాన్యుల సురక్షిత ప్రయాణాన్ని రక్షించుకునేందుకు ఎన్డీయే ప్రభుత్వాన్ని గద్దె దించాలి’’ అని ప్రజలను కోరారు.