ఇంటర్నెట్‌ డెస్క్‌: జమ్మూ-కశ్మీర్‌ (Jammu Kashmir) డోడా జిల్లాలోని ఓ గ్రామం. ఆ ఊరిలో దాదాపు సగం మంది బధిరులే. అయితేనేం.. ప్రజాస్వామ్య పండగలో పాల్గొనేందుకు తమ వైకల్యం అడ్డుకాదంటూ ఉత్సాహంగా పోలింగ్‌లో పాల్గొన్నారు. వీరిలో అనేక మంది తొలిసారి ఓటు హక్కు వినియోగించుకోవడం విశేషం. అన్ని వనరులున్నా పోలింగ్‌ కేంద్రానికి వెళ్లాలంటేనే బద్ధకిస్తున్న జనం ఉన్న ప్రస్తుత పరిస్థితుల్లో.. ఓటు హక్కును వినియోగించుకుంటూనే తమ చిరకాల డిమాండ్లను నెరవేర్చాలని కోరుతూ స్ఫూర్తిగా నిలుస్తున్నారు.

మంచు పర్వతాల్లో ఉన్న ధడ్కాహి గ్రామంలో గుజ్జర్లు నివసిస్తున్నారు. ఇది ఉధంపుర్‌ లోక్‌సభ (Lok Sabha Elections) స్థానం పరిధిలో ఉంది. ఇక్కడ 105 కుటుంబాలు నివసిస్తున్నాయి. అందులో 55 కుటుంబాల్లో కనీసం ఒకరు పుట్టుకతో మూగ లేదా చెవుడు సమస్యను ఎదుర్కొంటున్నారు. ఆ గ్రామంలో మొత్తం 84 మంది బధిరులు ఉన్నారు. వారిలో 43 మంది మహిళలు, 14 మంది పదేళ్లలోపు చిన్నారులే. అందుకే ఈ గ్రామానికి ‘సైలెంట్‌ విలేజ్‌’గా పేరుపడింది. ఇక్కడ ఈ తరహా పరిస్థితులను తొలిసారిగా 1939లోనే గుర్తించారు.

తాజా ఎన్నికల్లో ఉత్సాహంగా ఓటేసిన బధిరులు.. నేతలు తమ గ్రామానికి కనీస మౌలిక సదుపాయాలు కల్పిస్తారనే చిన్న ఆశ ఉందన్నారు. రోడ్డు మార్గం, ప్రాథమిక పాఠశాలలో ఉపాధ్యాయులు, ఆరోగ్యకేంద్రంలో వైద్యులను అందుబాటులో ఉంచడంతోపాటు పుట్టుకతో సమస్యను ఎదుర్కొంటున్న తమకు ఓ బధిర పాఠశాల ఏర్పాటు చేయాలని డిమాండ్‌ చేస్తున్నారు. ఒకవేళ తమ డిమాండ్లు నెరవేర్చకపోతే భవిష్యత్‌లో జరిగే ఎన్నికలను బహిష్కరిస్తామని హెచ్చరించడం గమనార్హం.