TS High Court: బుద్వేల్‌ భూముల వేలం.. అత్యవసర విచారణకు బార్‌ అసోసియేషన్‌ అభ్యర్థన

హైదరాబాద్‌: నగరంలోని రాజేంద్రనగర్‌ మండలం బుద్వేల్‌ భూముల ఈ-వేలం నిలిపివేయాలంటూ దాఖలు చేసిన పిల్‌పై అత్యవసర విచారణ చేపట్టాలని తెలంగాణ హైకోర్టు బార్‌ అసోసియేషన్‌ కోరింది. ఈ మేరకు హైకోర్టును అభ్యర్థించింది. బుద్వేల్ భూములు హైకోర్టు నిర్మాణానికి కేటాయించాలంటూ ఇటీవల బార్‌ అసోసియేషన్‌ పిల్‌ దాఖలు చేసింది. అసోసియేషన్‌ తరఫున కార్యదర్శి కట్టా ప్రదీప్‌రెడ్డి ఈ పిటిషన్‌ దాఖలు చేశారు. నేడే బుద్వేల్‌ భూముల వేలం ఉన్నందున లంచ్‌ మోషన్‌ విచారణ చేపట్టాలని పిటిషనర్‌ హైకోర్టును కోరారు.  

బుద్వేల్‌లో హైకోర్టు భవనం నిర్మాణానికి 100 ఎకరాలు కేటాయించాలని అసోసియేషన్‌, రిజిస్ట్రార్‌ జనరల్‌ పంపిన ప్రతిపాదనలను ప్రభుత్వం పట్టించుకోకుండా వేలం నిర్వహణకు నోటిఫికేషన్‌ జారీ చేయడాన్ని సవాలు చేస్తూ ప్రదీప్‌రెడ్డి ఈ పిటిషన్‌ దాఖలు చేశారు. హైకోర్టు తరలింపుపై భిన్నాభిప్రాయాలు ఉన్నందున అధ్యక్షుడు, కార్యవర్గంతో చర్చించాలని పిటిషనర్‌కు ధర్మాసనం సూచించింది.