Telangana news: మా భూములు ఇచ్చేది లేదు..: రైతులు

మహబూబ్‌నగర్‌: మహబూబ్‌నగర్ జిల్లా హన్వాడ మండలంలో ఏర్పాటు చేయబోయే ఆహార శుద్ధి పరిశ్రమ కేంద్రానికి ఆదిలోనే చుక్కెదురవుతోంది. మొదటి దశలో 244 ఎకరాలను సేకరించి ఆ స్థలాన్ని రాష్ట్ర పారిశ్రామిక మౌలిక సదుపాయాల సంస్థకు అప్పగించగా.. మౌలిక వసతుల కల్పన పనులు మొదలయ్యాయి. దీంతో ఆ భూములలో అసైన్డ్ పట్టా ఉన్న కొందరు రైతులు నిరసనకు దిగారు. ఆ భూములనే తాము సాగు చేసుకుంటామని.. పరిశ్రమలకు ఇచ్చే ప్రసక్తే లేదని తెగేసి చెబుతున్నారు. దశాబ్దాలుగా ఈ భూములే జీవనాధారంగా ఉన్నాయని, వాటిని లాక్కోవడానికి ప్రయత్నిస్తే ఆందోళనలకు దిగుతామని హెచ్చరిస్తున్నారు.