హోలీ.. చీరకట్టులో పురుషుల కేళీ!

కర్నూలు జిల్లాలో ఆసక్తి కలిగిస్తున్న సంప్రదాయం

కర్నూలు: హోలీ పండుగను పురస్కరించుకొని కర్నూలు జిల్లాలో పురుషులు చీరలు ధరించి పూజలు చేసే సంప్రదాయం ఆసక్తి కలిగిస్తోంది. కర్ణాటక సరిహద్దులోని ఆదోని మండలం సంతేకుడ్లూరు గ్రామంలో హోలీ మరుసటి రోజున పురుషులు.. స్త్రీ వేషంలోకి మారిపోతారు. చిన్న పిల్లల నుంచి పెద్దవారి వరకు చీరలు ధరించి, తలలో పూలు పెట్టుకుని అందంగా ముస్తాబై రతీ మన్మథులకు ప్రత్యేక పూజలు చేస్తారు. తరతరాల నుంచి పాటిస్తున్న ఈ ఆచారంతో కోరిన  కోర్కెలు తీరుతాయనేది అక్కడి ప్రజల విశ్వాసం. దాదాపు 200 సంవత్సరాల నుంచి గ్రామంలో ఈ ఆచారం పాటిస్తున్నట్లు స్థానికులు తెలిపారు. 
హిందూ, ముస్లిం అనే తేడా లేకుండా అన్ని మతాల పురుషులు.. స్త్రీ వేషంలో పూజలు చేస్తారు. ఈ వింత ఆచారాన్ని చూసేందుకు పొరుగు రాష్ట్రాల నుంచి సైతం ప్రజలు తరలివస్తారని స్థానికులు చెబుతున్నారు.