జగిత్యాల: పాలపై సీతారాముల చిత్రాలు

రాఘవపట్నం: జగిత్యాల జిల్లా రాఘవపట్నంకు చెందిన  కళాకారుడు చోళేశ్వర్ మరోసారి తన ప్రతిభను చాటుకున్నారు. శ్రీరామనవమిని పురస్కరించుకొని పాల మీద పలు రకాల రంగులతో సీతారాముల చిత్రాలను అద్భుతంగా తీర్చిదిద్దారు. వేములవాడలోని మైనార్టీ గురుకుల పాఠశాలలో ఆర్ట్స్ అండ్‌ క్రాఫ్ట్స్‌ ఉపాధ్యాయుడిగా పనిచేస్తున్న చోళేశ్వర్ సమయం దొరికినప్పుడల్లా సూక్ష్మ చిత్రకళతో ఆకట్టుకుంటున్నారు. శ్రీరామనవమి సందర్భంగా పాలపై తీర్చిదిద్దిన సీతారాముల చిత్రాన్ని కేవలం 15 నిమిషాల్లోనే గీసినట్లు ఆయన వెల్లడించారు. చోళేశ్వర్ ప్రతిభను పాఠశాల ప్రిన్సిపల్ తిరుపతితో పాటు సహా ఉపాధ్యాయులు అభినందించారు.