KCR: కేసీఆర్‌ ఆరోగ్యంపై రెండో రోజు హెల్త్‌ బులిటెన్‌ విడుదల

హైదరాబాద్‌: భారాస అధినేత, మాజీ సీఎం కేసీఆర్ (KCR) క్రమంగా కోలుకుంటున్నారు. శుక్రవారం జరిగిన తుంటి ఎముక మార్పిడి శస్త్ర చికిత్స విజయవంతం కావడంతో.. వైద్యుల పర్యవేక్షణలో ఆయన నడవడానికి ప్రయత్నిస్తున్నారు. ఈ మేరకు శనివారం సాయంత్రం యశోద ఆసుపత్రి వైద్యులు రెండో రోజు హెల్త్‌ బులిటెన్‌ విడుదల చేశారు.

‘‘కేసీఆర్‌ ఆరోగ్యం ప్రస్తుతం నిలకడగా ఉంది. ఆయన్ను నిత్యం వైద్య బృందం పర్యవేక్షిస్తోంది. బెడ్‌ మీద నుంచి లేచి నడవగలుగుతున్నారు. ఆర్థోపెడిక్‌, ఫిజియోథెరపీ వైద్యుల పర్యవేక్షణలో కేసీఆర్‌ నడుస్తున్నారు. ఆయన ఆరోగ్య పురోగతి పట్ల సంతృప్తిగా ఉన్నాం’’ అని యశోద ఆసుపత్రి వైద్యులు తెలిపారు.