Overthinking: అతిగా ఆలోచించకండి.. అలసిపోతారు!

ఇంటర్నెట్‌ డెస్క్: ఎక్కువ పని చేస్తే శరీరం ఎలా అలసిపోతుందో.. ఎక్కువగా ఆలోచించినా సరే అలసిపోతారట! శారీరకంగా అలసిపోతే ఓ కునుకు తీసి, కాసేపు  విశ్రాంతి తీసుకుంటే సరిపోతుంది. కానీ అతిగా ఆలోచించడం వల్ల శారీరకంగా, మానసికంగా అనేక సమస్యలు తలెత్తుతాయి. దీనికి పరిష్కార మార్గాలేవో తెలుసుకుందామా!

* అతి ఏ విషయంలోనూ అంత మంచిది కాదంటారు. నిజమే ఎక్కువగా ఆలోచించడం వల్ల వర్తమానంలో జీవించే సమయాన్ని, అవకాశాన్ని కోల్పోతారు. 

* పదే పదే ఆలోచించడం వల్ల చేస్తున్న పని మీద ధ్యాస ఉండదు. దీంతో అన్ని పనులు ఆలస్యమవుతాయి. 

*  ఆలోచన తిండిమీద కూడా ప్రభావం చూపుతుంది.  సరిగా ఆకలి వేయదు. కాస్త తినగానే చేయి కడిగేస్తారు. మరికొందరికి భోజనం మీద ధ్యాసే ఉండదు. 

* ఎప్పుడూ ముభావంగా ఉంటారు. చుట్టుపక్కల వారితో కలవలేరు. దీంతో ఒంటరితనం ఆవహిస్తుంది. మానసికంగా కుంగిపోతారు.

* సమస్య చిన్నదైనా, పెద్దదైనా పరిష్కారం కోసం వెతికినప్పుడు మాత్రమే ఆలోచించడం ఉత్తమమైన పద్ధతి. అలా కాకుండా రోజంతా అదే పనిగా ఆలోచిస్తూ ఉంటే సమయం వృథా అవుతుందే తప్ప ఫలితం ఉండదు. 

* ఎప్పుడూ ముభావంగా ఉండటం, నలుగురితో ఉండకపోవటం వల్ల ఇతరులకి మీ మీద వ్యతిరేక భావం ఏర్పడుతుంది. 

* మీ ప్రవర్తనను బట్టి ఇతరులు మీ పరిస్థితిని అంచనా వేస్తూ ఉంటారు. మీకు సమస్యలు ఉన్నాయనే విషయం ఇతరులకు తెలియకపోవడమే మంచిది. అందువల్ల ఇతరుల ముందు దిగులుగా ఉండకండి.

* ఎన్ని సమస్యలు ఉన్నా చిరునవ్వుతో ఎదుర్కోవాలి అంటుంటారు. అందువల్ల చింతించకండి. 

* ప్రశాంతంగా ఉండండి. దీనివల్ల ఆలోచనా పరిధి విస్తృతమవుతుంది. సమస్యలను సులువుగా పరిష్కరించుకోగలుగుతారు.

జరిగిన, జరగబోయే దాని గురించి ఆలోచించకుండా ప్రస్తుత క్షణాలను ఆస్వాదిస్తూ ముందుకు వెళ్లండి. ఎలాంటి సవాళ్లనయినా ఆత్మవిశ్వాసంతో ఎదుర్కోండి. ఆనందమైన జీవితం మీ సొంతమవుతుంది.