ఆక్స్‌ఫర్డ్ టీకా రెండోదశ ట్రయల్స్‌ ప్రారంభం

పుణె: ప్రఖ్యాత ఆక్స్‌ఫర్డ్‌ విశ్వవిద్యాలయం అభివృద్ధి చేసిన కరోనా వ్యాక్సిన్‌ రెండో దశ క్లినికల్ ట్రయల్స్‌ పుణెలో ప్రారంభమయ్యాయి. భారతీ విద్యాపీఠ్‌ కళాశాలతో పాటు ఆసుపత్రిలో ప్రయోగ పరీక్షలు ప్రారంభమైనట్లు సంబంధిత వర్గాలు తెలిపాయి. బ్రిటీష్‌ స్వీడిష్ ఫార్మా కంపెనీ ఆస్ట్రాజెనెకా సహకారంతో ఆక్స్‌ఫర్డ్‌ విశ్వవిద్యాలయం అభివృద్ధి చేసిన కొవిడ్‌ టీకాను ఉత్పత్తి చేసేందుకు పుణెకు చెందిన సీరం ఇన్‌స్టిట్యూట్‌ ఆఫ్‌ ఇండియా ఒప్పందం చేసుకుంది. వ్యాక్సిన్‌ ట్రయల్స్‌ కోసం దరఖాస్తు చేసుకున్న ఐదుగురికి కొవిడ్‌ యాంటీబాడీస్‌ పరీక్షలు నిర్వహించగా వారిలో ముగ్గురికి యాంటీబాడీస్‌ పాజిటివ్‌గా రావడంతో క్లినికల్‌ ట్రయల్స్‌ నుంచి తప్పించారు. టీకా వేసుకున్న ఇద్దరు వైద్యుల పర్యవేక్షణలో ఉన్నట్లు ఆసుపత్రి వర్గాలు తెలిపాయి. వారం రోజులపాటు 25 మంది వాలంటీర్లకు టీకా ఇవ్వనున్నట్లు తెలిపాయి.