Ap News: డిగ్రీ ప్రశ్నా పత్రం లీక్.. సామాజిక మాధ్యమాల్లో వైరల్‌

తిరుపతి: చిత్తూరు జిల్లా తిరుపతిలోని శ్రీవేంకటేశ్వర వర్సిటీ పరిధిలో డిగ్రీ ప్రశ్నా పత్రం లీకేజీ కలకలం రేగింది. జిల్లాలోని మదనపల్లెలో బీకాం ఆరో సెమిస్టర్‌ అకౌంట్స్‌ మేనేజింగ్‌ అకౌంటింగ్‌ పరీక్ష ప్రశ్నా పత్రం లీకైంది. ఇవాళ మధ్యాహ్నం 2 గంటల నుంచి సాయంత్రం 5 గంటల వరకు మేనేజింగ్‌ అకౌంటింగ్‌ పరీక్ష జరగాల్సి ఉంది. ఇవాళ ఉదయం 11.42 గంటలకే లీకైన ప్రశ్నా పత్రం సామాజిక మాధ్యమాల్లో వైరల్‌ అయింది. ఈ నెల 23 నుంచి ఎస్‌వీయూ పరిధిలో డిగ్రీ పరీక్షలు ప్రారంభమయ్యాయి. వర్సిటీ పరిధిలోని 112 కళాశాలల్లో పరీక్షలు జరుగుతుండగా.. 73 వేల మంది డిగ్రీ విద్యార్థులు పరీక్షలు రాస్తున్నారు. వారిలో 25 వేల మంది చివరి సంవత్సరం పరీక్షలు రాస్తున్నారు.