TSPSC: దరఖాస్తు చేసుకోకపోయినా గ్రూప్‌-1 హాల్‌టికెట్‌.. వివరణ ఇచ్చిన టీఎస్‌పీఎస్సీ

హైదరాబాద్‌: గ్రూప్‌-1 పరీక్షకు దరఖాస్తు చేసుకోకపోయినా ఓ అభ్యర్థికి హాల్‌టికెట్ జారీ చేశారని జరుగుతున్న ప్రచారంపై తెలంగాణ పబ్లిక్‌ సర్వీస్‌ కమిషన్‌ (TSPSC) వివరణ ఇచ్చింది. ఆ వార్తలను టీఎస్‌పీఎస్సీ అధికారులు ఖండించారు. అదంతా తప్పుడు ప్రచారమని స్పష్టం చేశారు. ‘‘నిజామాబాద్‌ అభ్యర్థి జక్కుల సుచరిత గతేడాది గ్రూప్‌-1 పరీక్షకు దరఖాస్తు చేశారు. అక్టోబర్‌లో నిర్వహించిన పరీక్షకు ఆమె హాజరయ్యారు. గ్రూప్‌-3, గ్రూప్‌-4 దరఖాస్తు చేస్తే గ్రూప్‌-1 హాల్‌టికెట్‌ ఇచ్చారన్న ప్రచారం అబద్ధం’’ అని టీఎస్‌పీఎస్సీ అధికారులు తెలిపారు.

కాగా.. రాష్ట్రవ్యాప్తంగా గ్రూపు-1 ప్రిలిమినరీ పరీక్ష ఆదివారం జరిగిన విషయం తెలిసిందే. 994 పరీక్ష కేంద్రాల్లో నిర్వహించిన పరీక్షకు 2,33,248 (61.37శాతం) మంది అభ్యర్థులు హాజరయ్యారు. గతేడాది జరిగి, రద్దయిన గ్రూప్‌-1 ప్రిలిమినరీ పరీక్షకు 2.86 లక్షల మంది (79.15 శాతం) హాజరుకాగా.. రెండోసారి నిర్వహించిన ఈ పరీక్షకు వారిలో దాదాపు 53 వేల మంది దూరంగా ఉండడం గమనార్హం.