రాబందులు రోజుకు 150కి.మీ ప్రయాణిస్తాయ్‌!

ఇంటర్నెట్‌ డెస్క్‌: పర్యావరణ పరిరక్షణకు ఉపకరించే పక్షుల్లో రాబందులు ఒకటి. ఒకప్పుడు దేశంలో అనేక ప్రాంతాల్లో విరివిగా కనిపించే రాబందులు కాలక్రమంలో కనుమరుగవుతున్నాయి. ఆధునిక కాలంలో అవి వాటి ఉనికిని కోల్పోతూ అంతరించిపోతున్న జాతుల జాబితాలో చేరాయి. అయితే, వీటికి సంబంధించిన ఓ ఆసక్తికరమైన విషయాన్ని మధ్యప్రదేశ్‌లోని పన్నా టైగర్‌ రిజర్వ్‌(పీటీఆర్‌) అధికారులు వెల్లడించారు. రాబందులు ఆహారం కోసం రోజుకు దాదాపు 150 కి.మీ ప్రయాణిస్తాయని తెలిపారు. రాబందుల దినచర్యను పరిశీలించడం కోసం పీటీఆర్‌లో ఉన్న కొన్ని రాబందులకు రేడియో-ట్రాకింగ్‌ పరికరాలను అమర్చారు. ఈ క్రమంలోనే రాబందుల ప్రయాణించే దూరమెంతో తెలిసింది.

‘‘మా సంరక్షణలో ఉన్న రాబందుల్లో మూడు రాబందులకు గత నవంబర్‌లో రేడియో-ట్రాకింగ్‌ పరికరాలు అమర్చి వాటి దినచర్యను పరిశీలించాం. అవి ఆహారం కోసం ప్రతి రోజు 100 కి.మీ నుంచి 150 కి.మీ ప్రయాణిస్తున్నాయి. ఈ మూడు రాబందులు తరచూ పన్నా నుంచి పక్కరాష్ట్రమైన ఉత్తరప్రదేశ్‌కు వెళ్లి సాయంత్రం వేళకు తిరిగి వస్తున్నాయి’’అని పీటీఆర్‌ డైరెక్టర్‌ ఉత్తమ్‌ కుమార్‌ శర్మ తెలిపారు. మరికొన్ని రాబందులకు కూడా త్వరలో రేడియో-ట్రాకింగ్‌ పరికరాలను అమర్చనున్నట్లు చెప్పారు. 2019 గణాంకాల ప్రకారం మధ్యప్రదేశ్‌లో 8,397 రాబందులు ఉన్నట్లు అధికారులు తెలిపారు. దేశంలోని ఇతర రాష్ట్రాలతో పోలిస్తే మధ్యప్రదేశ్‌లో ఉన్న రాబందుల సంఖ్యే అధికం.

ఇవీ చదవండి..

మేక @ జూమ్‌ మీటింగ్స్‌

బర్డ్‌ఫ్లూ: గుడ్డు.. మాంసం తినొచ్చా?