Anand Mahindra: సవాళ్లకే ఆమె సవాల్‌.. మహిళా ఆటోడ్రైవర్‌పై ఆనంద్ మహీంద్రా ప్రశంసలు

ఇంటర్నెట్‌ డెస్క్‌: సోషల్‌మీడియాలో ఎంతో యాక్టివ్‌గా ఉండే ప్రముఖ పారిశ్రామికవేత్త ఆనంద్ మహీంద్రా (Anand Mahindra).. ఎప్పటికప్పుడు సందేశాత్మక, స్ఫూర్తిదాయక విషయాలను పోస్ట్‌ చేస్తుంటారు. ఇటీవల ఓ పంజాబీ మహిళ స్ఫూర్తి గాథను పంచుకున్నారు. పిల్లలను చదివించడం కోసం ఆటోడ్రైవర్‌గా మారిన ఆ మహిళ ఎంతోమందికి ఆదర్శమని కొనియాడారు.

‘‘పరమ్‌జిత్‌ కౌర్‌.. పంజాబ్‌లో మా మహీంద్రా ఎలక్ట్రిక్‌ ఆటోను కొనుగోలు చేసిన తొలి మహిళా కస్టమర్‌. భర్తను కోల్పోయిన తర్వాత ఆమె తన ఇంటికి మూలాధారమయ్యారు. తన కుమార్తెల్లో ఒకరు ఇప్పుడు కాలేజీలో చదువుతున్నారు. పిల్లలను పెంచి పెద్ద చేసేందుకు మా ‘ఇ ఆల్ఫా మినీ(ఎలక్ట్రిక్ ఆటో)’ ఆమెకు భరోసాగా మారింది. సవాళ్లను అధిగమించి ఎలా ఎదగాలో ఆమె నిరూపించారు’’ అని ఆనంద్‌ మహీంద్రా ట్విటర్‌లో రాసుకొచ్చారు. ఆమె ఫొటోను కూడా జత చేశారు.

ఈ పోస్ట్‌కు నెట్టింట పెద్ద ఎత్తున ప్రశంసలు వచ్చాయి. ‘‘సమస్యలతో సతమతమవుతున్న ఎంతోమందికి ఆమె ఆదర్శం. ఆత్మవిశ్వాసంతో ఆమె జీవితంలో ముందుకెళ్తోంది’’ అని ఓ నెటిజన్‌ అభినందించారు. ‘‘ప్రతికూలతలు ఎదురైనా వెనుకడుగు వేయకుండా జీవితంతో పోరాడుతున్న ఆమెకు సెల్యూట్‌. అద్భుతం’ అని మరికొందరు ఆమెను కొనియాడారు.