Manipur: ఆందోళనల్లో నష్టపోయిన వారికి కేంద్రం సాయం.. రాష్ట్రానికి ₹ 101 కోట్ల ఉద్దీపన ప్యాకేజీ

ఇంఫాల్‌: గత నెల రోజులుగా హింసాత్మక ఆందోళనలతో అట్టుడుకుతున్న మణిపుర్‌ (Manipur)కు కేంద్రం (Central Govt) ₹ 101.75 కోట్ల సాయాన్ని ప్రకటించింది. ఆందోళనల్లో నష్టపోయిన వారికి సాయం అందించేందుకు ఈ మొత్తాన్ని వినియోగించనున్నట్లు రాష్ట్రప్రభుత్వ భద్రతా సలహాదారు కుల్‌దీప్‌ సింగ్ తెలిపారు. ప్రస్తుతం రాష్ట్రంలో ఉద్రిక్తతలు తగ్గాయని, గడచిన 48 గంటల్లో ఎక్కడా హింసాత్మక ఘటనలు చోటుచేసుకోలేదని వెల్లడించారు. ‘‘గత నెల రోజులుగా రాష్ట్రంలో చెలరేగిన హింస కారణంగా నష్టపోయిన వారికి సాయం అందించేందుకు కేంద్రం ₹ 101.75 కోట్ల సాయం అందించేందుకు అంగీకరించింది. కొద్దిరోజుల క్రితం రాష్ట్రంలో పర్యటించిన కేంద్ర హోంమంత్రి అమిత్‌షా, సాయం కోసం కేంద్రానికి అభ్యర్థన పంపించాలని రాష్ట్ర అధికారులకు సూచించారు. రాష్ట్రం పంపిన అభ్యర్థనను పరిశీలించిన కేంద్ర ప్రభుత్వం ఉద్దీపన ప్యాకేజ్‌ని ప్రకటించింది’’ అని సింగ్ తెలిపారు. 

గడచిన 24 గంటల్లో భారీ ఎత్తున ఆయుధాలను భద్రతాదళాలు స్వాధీనం చేసుకున్నాయి. లోయ ప్రాంతంలోని ఐదు జిల్లాల్లో 12 గంటలు, పక్కనే ఉన్న కొండ ప్రాంతంలోని జిల్లాల్లో 8 నుంచి 10 గంటలు కర్ఫ్యూ సడలించినట్లు సింగ్‌ తెలిపారు. కొండ ప్రాంతంలోని మరో ఆరు జిల్లాల్లో కర్ఫ్యూ అమలు చేయడం లేదన్నారు. 

‘‘రాష్ట్రంలో శాంతిని నెలకొల్పేందుకు భద్రతా బలగాలు సామాజిక సంస్థలతో కలిసి ప్రత్యేక కార్యక్రమాలు చేపట్టాయి. సున్నితమైన ప్రాంతాల్లో భద్రతను ఉన్నతస్థాయి అధికారులు నిరంతరం పర్యవేక్షిస్తున్నారు. రాష్ట్ర మంత్రులు, ఎమ్మెల్యేలు, ఎంపీలు వారి నియోజకవర్గాల్లో పర్యటిస్తూ.. శాంతిని నెలకొల్పేందుకు ప్రయత్నిస్తున్నారు’’ అని సింగ్‌ తెలిపారు. గత నెలరోజులుగా మణిపుర్‌లో చెలరేగిన హింసలో తీవ్రంగా ఆస్తి, ప్రాణ నష్టం జరిగింది. సుమారు 100 ప్రాణాలు కోల్పోగా, 300 మందికి పైగా గాయపడ్డారు.